Description
“Lis baronadis di Pinochio” e je la traduzion par furlan di pre Antoni Beline de innomenade opare di Carlo Collodi, “Le avventure di Pinocchio. Storia di un burattino”.
Opare mestre de leterature mondiâl pai fruts, e je une storie di grande umanitât che e conte lis aventuris dal buratin e lis sôs scuviertis, i erôrs, lis injustiziis e lis sperancis che infin lu fasaran deventâ pardabon uman.
Carlo Collodi, pseudonim di Carlo Lorenzini, (Florence 1826 – 1890) al è stât scritôr e gjornalist di grande innomine par vê scrit “Le avventure di Pinocchio. Storia di un burattino” (1883), romanç pai fruts vendût in passe 80 milions di copiis in dut il mont, che al à fat deventâ Collodi l’autôr talian plui let a nivel internazionâl.
Antoni Beline, Pietrantonio Bellina (Vençon 1941 – Visepente 2007) al è stât predi, scritôr e inteletuâl. Al è stât plevan a Val, Rualp e Treli in Cjargne e a Visepente, e al à fat ancje l’insegnant di religjon e po il mestri elementâr. Scritôr che al à publicât passe 45 oparis, al à voltât par furlan tescj tant che “Lis flabis di Fedro”, “Lis flabis di Esopo”, “Lis baronadis di Pinochio” e po “La Bibie” (adun cun pre Checo Placerean), che i à dedicât plui di 13 agns, e il “Messâl Roman”, dôs oparis fondamentâls par puartâ la liturgjie par furlan in glesie.
Andrea Zuccolo (Buri, 1955) atôr, poete, al à lavorât cun compagniis di prose privadis e teatris stabii, cun regjiscj tant che Luca Ronconi e Carmelo Bene. Al à partecipât a edizions dal Festival Mittelfest a Cividât, sedi come interprete sedi come autôr. Te golaine “Logo – suns, peraulis e scrituris”, al è la vôs dal audiolibri “Il Piçul Princip”.
Laura Torrico (Lecco, 1974) e je a stâ e e lavore in Friûl. Une artiste pluridissiplinâr che si môf tra piture e dissen cui lapis e tecnichis miscliçadis. E je ilustradore di libris pe infanzie e di narative. Une vore di sôs oparis a son deventadis cuviertinis di libris e di albums musicâi.
Massimo Gatti (Milan, 1957) musicist, compositôr, tecnic audio, al è considerât un dai miôr mandoliniscj in Europe. Al à colaborât cun Fabrizio De Andrè in “Anime salve”. Il so toc “Frangenti”, regjistrât dal pianist George Winston in “Plains”, al à vinçût un Grammy Award tal 1999.
This post is also available in: Italian
